ថៃ៖ ក្រុមចម្រុះនៅក្នុងរដ្ឋាភិបាលដែលដឹកនាំដោយគណបក្សភឿថៃកំពុងស្ថិតក្នុងការពិចារណា និងពិភាក្សារកផែនការឆ្លើយតបទៅនឹងសេចក្ដីសម្រេចរបស់តុលាការធម្មនុញ្ញ ដែលនឹងសម្រេចអំពីតំណែងនាយករដ្ឋមន្រ្តី ស្រីថា ថាវីស៊ីន (Srettha Thavisin)។ គួរឱ្យដឹងថា លោកនាយករដ្ឋមន្រ្តី Srettha អាចប្រឈមនឹងការបណ្ដេញចេញពីតំណែង ជុំវិញករណីដែលលោកបានតែងតាំងអតីតទណ្ឌិត លោក ភិឈិត ឈឿនបាន (Pichit Chuenban) ជារដ្ឋមន្ត្រីនៃគណៈរដ្ឋមន្ត្រីថៃ។

បើតាមការលើកឡើងពីឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្ម លោក ភុំថាំ វីឆាយ៉ាឆៃ (Phumtham Wechayachai) បានបញ្ជាក់ថា គណបក្ស និងតំណាងចម្រុះបានបើកកិច្ចប្រជុំប្រចាំខែនៅវិមានរដ្ឋាភិបាលកាលពីថ្ងៃចន្ទកន្លងទៅ ប៉ុន្តែលោកអះអាងថា"វាគ្រាន់តែជាការពិភាក្សាធម្មតាប៉ុណ្ណោះ ដែលយើងនឹងពិភាក្សាអំពីការងាររបស់រដ្ឋាភិបាល បញ្ហាប្រឈម និងឧបសគ្គនានា ដើម្បីអាចស្វែងរកដំណោះស្រាយសមស្របមួយ"។

លោក Phumtham ដែលជាអ្នកនាំពាក្យរដ្ឋាភិបាលផងនោះបញ្ជាក់ថា៖ "យើង (រដ្ឋាភិបាល) នៅមិនទាន់មានការរៀបចំផែនការត្រៀមអ្វីឡើយ ដោយទុកឱ្យតុលាការធ្វើការដោយឯករាជ្យ ហើយយើងត្រូវគោរពលើសេចក្ដីសម្រេចរបស់តុលាការ"។ រដ្ឋមន្ត្រីពាណិជ្ជកម្មរូបនេះបញ្ជាក់ថា រដ្ឋាភិបាលមិនមានសេណារីយ៉ូណាមួយត្រៀមទុកនៅឡើយ ប្រសិនបើនាយករដ្ឋមន្ត្រីត្រូវបានបណ្ដេញចេញពីតំណែង។ 

សូមបញ្ជាក់ថា ញត្តិដែលស្នើឱ្យមានការបណ្តេញលោក Srettha ចេញពីតំណែងនាយករដ្ឋមន្ត្រីត្រូវបានដាក់កាលពីខែឧសភា ដោយក្រុមអតីតសមាជិកព្រឹទ្ធសភាចំនួន ៤០នាក់ ដែលបាននិយាយថាលោក Pichit មិនគួរត្រូវបានពិចារណាសម្រាប់តំណែងរដ្ឋមន្ត្រីនេះឡើយ សូមបញ្ជាក់ផងដែរថា លោក Pichit ត្រូវបានផ្តន្ទាទោសពីបទ បំពានតុលាការដោយប៉ុនប៉ងសូកប៉ាន់មន្ត្រីតុលាការកំពូលក្នុងឆ្នាំ២០០៨ ដែលលោកជាអ្នកតំណាងឱ្យអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា (Thaksin Shinawatra) ក្នុងសំណុំរឿងដីធ្លីដ៏ចម្រូងចម្រាសមួយ៕